Isa 10 | ZomZIV | STEP | Mizawngte thuneihna heikhiatsak nading, a kinengniam ka mite neihsa suh theih nading, meigongte mat theih nading le pa nei lote na suh theih nadingin

Isaiah 10

1 Mizawngte thuneihna heikhiatsak nading,
a kinengniam ka mite neihsa suh theih nading, ^a
meigongte mat theih nading le
pa nei lote na suh theih nadingin
2 a ukcip nading thukip bawla,
thutang lo thukham a bawlte in gimna thuak ta hen.
3 Gamlapi pan gimna hong pai ciang, ^b
thukhenna ni ciangin bang na cih ding hiam? ^c
Hong huh dingin kua bel ding na hi hiam? ^d
Na hauhna koi-ah nusia ding na hi hiam?
4 Thongkiate lakah toncip ding
ahikeh a kithatte lakah puk ding longal bangmah dang a om kei hi. ^e
Hizahta hi khin napi a hehna dai tuan loin ^f
a khut liikto lailai hi.

Assyria tunga Pasian Thukhenna

5 “A khut uh ka hehna cianggolh le ka thangpaihna khetbuk-a ka zat ^g
Assyria-te tungah gimna tung ta hen! ^h
6 Pasian neilo minamte amah ka dosak dinga, ⁱ
kei hong hehsak mite neihsa sutin laksakin ^j
kongzing buan bangin
amaute ka cilsak ding hi.
7 Ahi hangin hih pen ama sawm hi loin,
ama ngaihsut ahi kei hi.
Ama tupna ahileh susia ding,
minamte tampi beisak ding ahi hi.
8 Amah in, ‘Ka galkap mang khempeuh kumpi hilo hiam?’ ci hi. ^k
9 Calno zong Carchemish bang ta hi lo hiam? ^l
Hamath le Arpad kibang ta a,
Samaria le Damascus kibang ta hi lo hiam?
10 Ka khut in milim
kumpi gamte a mat bangin a milim suih hoih Jerusalem le Samaria manin -
11 Samaria le a suih milimte ka hih bangin Jerusalem le a suih milimte hih lo ding ka hi hiam?’ ci hi,” a ci hi. ^m

12 Topa in Zion Vum le Jerusalem langkhatah a sep ding khempeuh a zawh ciangin, “Assyria kumpipa a lungsim kiphatsak-luatna le a kihihsak mithek hangin gimna a thuaksak ding hi. 13 Ahang in, amah in: ⁿ

“‘Keimah in theihtelna ka neih manin
ka pilna le ka khut thahatna tawh ka hih zo hi. ^o
Minamte gamgite ka suankhia a,
a goute uh ka laksak hi;
a thahatpa khat bangin a kumpite uh ka thuzawh ^{▼▼10.13 Ahikeh / a thahatna uh ka zothawh hi.} gawp hi.
14 Vasa bu lak bangin
minamte’ hauhna ka laksak a,
mite in a pi loihsa vasa tui a khop bangin
gamte khempeuh ka khawm a,
khat beek in a kha zap loin
a ham dingin khat beek a kamka kei hi,’ ci hi,” a ci hi.
15 Azangpa tungah hei kiliansak ding ahi hiam,
ahikeh a zangpa tungah sing-attem kisathei ding ahi hiam? ^q
Ciangkhut in a khunpa a vei loh bangin
khetbuk in sing ahi lo khat a vik kei ding hi. ^r
16 Tua ahi ciangin Topa, Thahatpen TOPA in
ama galhang tha hoihte tungah thabei natna a tungsak ding hi; ^s
ama thupina nuai-ah mei kuanglai bangin
a kuang den ding hi. ^t
17 Israel-te Khuavak, mei suak dinga, ^u
amaute’ Siangtho Pa meikuang a suak ding hi;
ni khat sungin kuang dinga
a lingte le a thanglingte kangtum ding hi.
18 Mi cinapa a gawngtaam bangin
a tulak le a lo lei hoih thupina
a kisia kiuhkeuh ding hi. ^v
19 Tuateh a om lai tulak singkungte tawm lua mahmah dinga
naupang khat gelh khit zawh zahin a tawm ding hi.

A Baanglai Israel-te

20 Tua ni ciangin a baanglai Israel-te, ^w
a suakta Jacob innkuante
amau a sattukte tungah kinga nawn loin
Israel-te Siangtho Pa,
TOPA tungah
a kinga taktak ding uh hi.
21 A baanglaite kileh kik in ^{▼▼10.21 Hebrew in Shear-jashub; tg.22 ah zong} A Thahat Pasian kiangah ^y
Jacob a baanglaite a kileh kik ding uh hi. ^z
22 Israel aw, na mite tuipi gei-a sehnel a bang zongin ^aa
a baanglaite bek hong kileh kik ding uh hi.
A husia leh a thumaan siatna a tun nadingin
kikhensat khin zo hi.
23 Leitung buppi tunga tung ding a kikhentatsa siatna Topa,
Thahatpen TOPA in a semkhia ding hi. ^ab

24 Tua ahi ciangin hih in Topa, Thahatpen TOPA gen:

“Zion a teng ka mite aw,
Egypt-te hong hih bangin
cianggolhin hong sat a,
no langa khetbuk a liik Assyria-te kihta kei un. ^ac
25 No tunga ka hehna a sawt loin bei pah dinga, ^ad
ka thangpaihna amaute siatna lamah kihei ding hi,” a ci hi. ^ae
26 Thahatpen TOPA in Oreb suangtumpi a,
Midiante a sattuk bangin amaute khauteepin vat dinga, ^af
Egypt a a hih bangin
tui tung tengah a ciangkhut a viik ding hi. ^ag
27 Tua ni ciangin amaute vangik na liangko panun hong kisankhia-in
na ngawng panun ^{▼▼10.27 Hebrew; Septuagint ah kitan / na liangkote panun} hakkol hong kisankhia ta ding hi;
note thau lua ta ding na hi manun
hakkolte a kisutan ding hi.
28 Amaute Aiath ah lut uh a;
Migron kantanin
Michmash ah a van uh a khol uh hi. ^ai
29 Amaute in mualciang kantanin,
“Geba ah zanin giahphual sat ni,” a ci uh hi.
Ramah a kiling hi; ^aj
Saul tenna Gibeah-a tai uh hi. ^ak
30 Gallim Tanu aw, awng khia in!
Laishah aw, ngai in!
Anathoth hehpihhuai si cia! ^al
31 Madmenah taikek ta;
Gebim mite bubu lai uh hi.
32 Tuni mahmah in Nob ah khawl uh hi;
amaute in Zion Tanu mual le
Jerusalem mualneute ^am
a khuttum uh a liiksan ding uh hi.
33 En un, Topa, Thahatpen TOPA in
a vanglianpi tawh a hiangte a heuhkhia ding hi.
Singkung sangpite puk ding uh a,
a sangtuamte a kiniamsak ding hi. ^an
34 Amah in tulak singte hei-in phuk dinga
Thahat-Pa mai-ah Lebanon a puk ding hi. ^ao